நாட்களை நகர்த்தியாச்சு

எங்கும் சுதந்திரம்
என்பதே பேச்சு
எல்லோருக்கும் வெற்றி
என்பதே உறுதியாச்சு

வீதிக்கு வீதி சாதிச்சங்கங்கள் ஏற்படுத்தியாச்சு
சாதிக்குச் சாதி
கட்சிகளும் வெச்சாச்சு

நெய்யும் துணிகள் எல்லாம்
கொடிகளுக்கே போயாச்சு
நெய்தவரின் பிள்ளைகளோ
அம்மணமாய் விளையாடலாச்சு

காடுகளைத் திருத்தி
கழனி திருத்த நினைச்சாச்சு
அதனால்
வயல்களெல்லாம் வீட்டுமனைகளாச்சு

விதவைகள் பொட்டு வைக்கலாம்
என கொள்கை பரப்பியாச்சு
சொன்னதைக் கேட்டு
மகிழ்வதற்குள்
நடுரோட்டில்
நாலுவயது சிறுமியும்
ஏழுவயது சிறுமியும் பாலியல் பாலாத்காரம் என்ற
செய்தி கேட்டு செவியெல்லாம் புண்ணாச்சு

எதிர்கால இந்தியா என்றே
இளைஞர்களைச் சொல்லியாச்சு
எனவே
அவர்கள்
பாக்கெட் மணிக்கு
பழுது வராமல் இருக்க
கூட்டுறவுத் துறையிலேயே
மதுக்கடைகள் உருவாச்சு

வரதட்சிணை அழியட்டும் என்று
வாய் கிழிய பேசியாச்சு
பேசிய பேச்சு காய்வதற்குள்
வண்டி தராமல் கல்யாணமா என
முறுக்கிக்கொண்டு போயாச்சு

பிரியமில்லாமல்பேசிக் கொண்டிருக்கும்
பக்கத்து வீட்டுக்காரன் மாதிரி
சக ஊழியன் மாதிரி
சமத்துவம் சகோதரத்துவம்
மேடைகளுக்கு மட்டுமே
பயன்படுத்தும் முக்கியச் சொல்லாச்சு

வேலையில்லாத் திண்டாட்டம்
குறைய வேண்டுமேனக் கூக்குரலிட்டு
இருந்தவர்களையும் எடுத்தாச்சு

உழைப்பு சர்வமயமாக்கல் என்ற பெயரில்
அந்நியப்பொருட்களை
மலிவு விலைக்கு த் தருவித்து
உள்ளூர் பொருள் உற்பத்தியை
முற்றிலுமாக முடக்கிப் போட்டாச்சு

சென்ற நூற்றாண்டுத் தலைவர்கள்
கனவுகளில் கூட
புதிய நூற்றாண்டு எழுப்பினார்கள்
இந்த நூற்றாண்டுத் தலைவர்கள்
புதிய உலகம் கனவைக்கூட
கரைத்து விடலாச்சு

கலப்படமே இல்லாத பொருள்
என்ற விளம்பரங்கள் போய்
கலப்படங்கள் குறைந்த பொருள்
என்றே விற்பனைகள் தொடங்கியாச்சு

பாலுக்கு நூலு இலவசம்
நூலுக்கு கோலு இலவசம்
என்றுஎவற்றுக்கு எது இலவசம்
என்று  தொலைக்காட்சி
விள்ம்பரங்கள் உன்னிப்பாய்
நோக்குவதே
 விவேகம் என்று பேசியாச்சு

புடவை சுடிதார் ஜீன்ஸ்
என்பது மாறி
பட்டு சுடிதார், பட்டு ஜீன்ஸ்
என்றுஎங்கள் பகுத்தறிவுகளும் பல்கிப் போச்சு

என்ன செய்தும்
பணம் பிழிந்து
பணம் கடைவது
என்பதே வாழ்க்கையாச்சு

அறிவை அப்புறப்படுத்தி
பணத்தை வைத்தே பண்பை
மதிக்கலாச்சு
எல்லாம் போய்
எல்லாம் இருந்து
என்ன பயன்??

பிஃஎப் லோனுக்கு நூறு ரூபாயும்
சொசைட்டி லோனுக்கு
இருநூறு ரூபாயும்
என்ற அளவிலேயே
அரசாங்க அலுவல்கள்
அன்றாடம் நடந்தேறியாச்சு

எதுக்கும்
பொறுமைகாட்டி பழகிப்போச்சு
பஸ் எரிச்சாலும்
மனுசன் எரிஞ்சாலும்
அலட்டாமல் நாட்களை
நகர்த்தியாச்சு
*****************************************************************