சொல்வதற்கு மட்டுமான சொல்

எல்லோரும்
எப்போதும் ஏதேனுமொன்றை
சொல்லிவிட்டுப்போகிறார்கள்
என்னிடம்
அப்படி செய், இப்படி செய் என்றோ
அதை செய்யாதே, இதை செய்யாதே என்றோ
அறிவுரைகள் நிறைந்ததாகவே
இருக்கிறது
பலருடைய பேச்சும்
இன்னும் சிலவைகள்
உத்தரவு போலவோ, ஆணை போலவோ
பிறப்பிக்கப்பட்டு விடுகின்றன!
எனக்குச் சொல்லியவைகளும்
எனக்குச் சொல்பவைகளும்
அவர்கள்
செய்து பார்த்ததா
செய்யாமல் விட்டதா
எனத்தெரியவில்லை
அவர்கள் சொல்லியதை
அவர்களே கூட
பின்பற்றுவார்களா என்று கூடத்தெரியாது
பின்பற்ற இயலுமா என்பதையும்
கூட அறியார்கள்
ஆனாலும்
சொல்லிக்கொண்டே இருக்கிறார்கள்
நான் செய்வேனா
செய்யப்போகிறேனா
செய்து விடுவேனா
என்பது பற்றி அறியாமல்......
******************************